Mu myaka ya vuba aha, ikoranabuhanga ryitwa Artificial Intelligence (AI) nibwo ryaje ariko rikomeje gutera imbere ku muvuduko udasanzwe. Ubu riri gukoreshwa mu bihugu byinshi ku isi, kandi ryamaze kwinjira no mu Rwanda. Ibi byatumye abantu benshi batangira kwibaza niba iri koranabuhanga rishobora gutuma bamwe mu bakozi babura akazi.

AI ni ikoranabuhanga rifasha mudasobwa gukora imirimo isanzwe ikorwa n’abantu, nko gusubiza ibibazo, gutunganya amakuru, kwandika inyandiko zimwe na zimwe, ndetse no gufata ibyemezo bishingiye ku makuru yabitswe. Uko iri koranabuhanga rikomeza gutera imbere, ni ko rigenda rifata imyanya imwe y’akazi yari isanzwe ikorwa n’abantu ibi bigatuma abantu benshi bashobora gukurwa kumirimo imwe nimwe bitewe n'uko ibyo bakorere ikiguzi runaka, AI cyangwase artificial intelligence zo ibikora kubuntu ahanini, kandi zikabikora neza kubarusha.

Niyihe mirimo izavanwamo abakozi bagasimbuzwa AI

Hari imirimo imwe n’imwe ishobora kugirwaho ingaruka zikomeye bitewe n’uko AI zishobora kuyikora vuba kandi neza. Iyi mirimo akenshi ni isaba gusubiramo ibintu bimwe buri munsi.  ingero z’iyo mirimo harimo; Abandika amakuru muri mudasobwa (data entry , Abatanga serivisi ku bakiriya bakoresheje telefone cyangwa internet, Abakora imirimo isanzwe mu biro nko gutunganya inyandiko zoroshye, Abacunga amakuru menshi mu bigo bitandukanye, Abakora imirimo nko gufotora, gutunganya amashusho ndetse niyindi.

Mu gihe kiri imbere, iyo mirimo ishobora kugabanuka kuko imashini zishobora kuyikora mu gihe gito kandi zidakoze amakosa menshi.

Ibigo byinshi ku isi byatangiye gukoresha AI kubera inyungu zitandukanye biyibonamo. Muri izo harimo:

Umuvuduko: AI ishobora gukora akazi kenshi mu gihe gito cyane kurusha umuntu.
Kugabanya ibiciro: Iyo AI imaze gushyirwaho, igabanya amafaranga ikigo cyatangaga ku bakozi benshi.
Kunoza akazi: Imashini zishobora kugabanya amakosa, cyane cyane mu kubara no gutunganya amakuru menshi.

Ibi bituma ibigo byinshi bikomeza gushora imari mu ikoranabuhanga rya AI, bikaba bishobora gutuma umubare w’abakozi bikenera ugabanuka mu mirimo imwe n’imwe.

Imirimo mishya izavuka kwisoko ry'imirimo kubera AI

Nubwo hari imirimo ishobora kugabanuka, Ntibivuze ko AI izatwara akazi kose. Ahubwo hari n’imirimo mishya ishobora kuvuka bitewe n’iri koranabuhanga rya artificial intelligence.

Muri iyo mirimo harimo

Ubuhanga mu gukoresha no kugenzura AI,

Kwandika porogaramu za mudasobwa,

Gusesengura amakuru (data analysts),

Gushushanya ibijyanye n’ikoranabuhanga (digital designing),

Kwigisha abandi uko bakoresha AI mu kazi kabo.

Ku rubyiruko rwo mu Rwanda, ibi bishobora kuba amahirwe yo kwiga ubumenyi bushya bujyanye n’ikoranabuhanga, bigatuma babona akazi keza mu gihe kiri imbere, kuko muminsi irimbere akazi kazajya kabona umuhanga mugukoresha ubu bwenge buhangano .

Icyo wakora kugirango utazabura akazi

Mu gihe isi igenda ihinduka kubera ikoranabuhanga, ni ngombwa ko abantu batangira kwitegura hakiri kare. Umuntu ushaka gukomeza kugira amahirwe ya kazi, agomba kwiga ubumenyi bushya bujyanye n’igihe.

Bimwe mu byo wakora harimo: Kwiga gukoresha mudasobwa neza, Kwiga gukoresha internet mu buryo bw’umwuga, Guhora wiyungura ubumenyi bushya bijyanye n’akazi ukora, Kwiga imirimo isaba gutekereza cyane no guhanga udushya.

Abantu biteguye kwiga no guhindura ubumenyi bwabo, bafite amahirwe menshi yo gukomeza kubona akazi no mugihe abandi bari kurira,

kuko mugihe isi turi kujya mo ari Digital gusa, ikeneye n'abantu bari Digital.