Iyo wohereje ifoto, video cyangwa indi file kuri telefoni y’inshuti utifashishije cable, bishobora kugaragara nk’ikintu gisanzwe cyane. Ukanda kuri "Share", ugahitamo igikoresho ushaka koherezaho, maze mu kanya gato file ikaba igezeyo.

Ariko se iyo data iba yaciye he? Ese telefoni ebyiri ziba zivugana gute kandi nta kintu na kimwe kizihuza ku buryo ubibona?

Igisubizo kiri mu buryo butandukanye bw’ikoranabuhanga bukoresha imiraba ya radio cyangwa ubundi buryo bwo kohereza amakuru. Dore bumwe mu buryo bukoreshwa cyane.

1. Bluetooth

Bluetooth ni bumwe mu buryo buzwi cyane bwo kohereza data hagati y’ibikoresho biri hafi. Telefoni, headphones, speakers, keyboards na watches ni zimwe mu devices zikoresha Bluetooth.

Iyo ibikoresho bibiri bihujwe, bitangira guhererekanya amakuru bikoresheje imiraba ya radio. Bluetooth ikoresha ingufu nke ugereranyije n’uburyo bumwe na bumwe bwo guhererekanya data, ariko kohereza file nini bishobora gutwara igihe kurusha Wi-Fi.

2. Quick Share / Nearby Share

Quick Share, izwi mbere cyane nka Nearby Share ku bikoresho bya Android, ni uburyo bwo kohereza files hagati y’ibikoresho biri hafi.

Ikintu gishimishije ni uko Bluetooth ishobora gufasha ibikoresho kumenyana no gutangiza connection, mu gihe Wi-Fi ishobora gukoreshwa mu kohereza data nyinshi ku muvuduko uri hejuru. Ni yo mpamvu kohereza video nini bishobora kwihuta cyane kurusha kuyohereza ukoresheje Bluetooth isanzwe.

Wasoma n'iyi: Cloud Computing ni iki? Kuki ibigo byinshi biyikoresha?

3. AirDrop

AirDrop ni uburyo bwa Apple bwo kohereza files hagati y’ibikoresho nka iPhone, iPad na Mac.

Kimwe n’ubundi buryo bwo kohereza files hafi, AirDrop ikoresha Bluetooth mu gufasha ibikoresho kubonana, hanyuma Wi-Fi ikagira uruhare mu kohereza data. Ibi bituma umuntu ashobora kohereza amafoto, videos n’izindi files atiriwe akoresha internet cyangwa cable.

4. Wi-Fi Direct

Wi-Fi Direct ituma ibikoresho bibiri cyangwa byinshi bishobora kuvugana hagati yabyo bitabanje kunyura kuri router isanzwe.

Urugero, telefoni ishobora guhuza direct na printer cyangwa indi device ikoresheje Wi-Fi Direct. Kubera ko ikoresha Wi-Fi, ishobora kohereza data ku muvuduko mwiza kurusha Bluetooth mu bihe byinshi.

5. Wi-Fi

Wi-Fi isanzwe na yo ishobora gukoreshwa mu guhererekanya data. Iyo devices ziri kuri network imwe, applications zitandukanye zishobora kuzifasha koherezanya files.

Aha Wi-Fi ntabwo iba ari internet ubwayo. Internet ni service ituma ugera ku zindi computer na servers zo hanze, mu gihe Wi-Fi ari uburyo bw’imiyoboro butuma ibikoresho byawe bishobora kuvugana cyangwa kugera kuri router.

6. NFC

NFC ni uburyo bwo guhererekanya amakuru hagati y’ibikoresho biri hafi cyane, akenshi bisaba ko byegerana cyane.

Ni bwo buryo usanga bukoreshwa mu kwishyura ukoresheje telefoni, guhuza devices no gusoma amakuru kuri NFC tags. Ntabwo ari bwo buryo bwiza bwo kohereza video nini kuko bukora ku ntera nto kandi data transfer yayo idateganyirijwe files nini.

7. UWB

UWB, cyangwa Ultra-Wideband, ni ikoranabuhanga rikoresha radio mu kohereza no kwakira amakuru, ariko rifite ubushobozi bwihariye bwo kumenya intera n’aho ikindi gikoresho giherereye mu buryo busobanutse cyane.

Ni yo mpamvu rishobora gukoreshwa muri smartphones, trackers n’izindi devices aho kumenya neza aho ikindi gikoresho kiri ari ingenzi.

Wasoma n'iyi: Impamvu mudasobwa yawe igenda buhoro n'uko wabikemura

8. Infrared

Infrared ni uburyo bukoresha urumuri rutagaragara n’amaso y’umuntu mu kohereza amakuru.

Bumwe mu buryo buzwi cyane ni remote control ya televiziyo. Remote yohereza infrared signals kuri TV, TV ikazisoma ikamenya niba wayisabye kongera amajwi, guhindura channel cyangwa gukora ikindi gikorwa.

Ubu buryo ntibukoreshwa cyane mu kohereza files hagati ya smartphones nk’uko byahoze bimeze, ariko buracyafite akamaro mu bikoresho byinshi.

9. Zigbee

Zigbee ni wireless technology yagenewe cyane cyane ibikoresho bikoresha ingufu nke kandi bikohereza data nke.

Ikoreshwa cyane muri smart home, aho ushobora kugira sensors, amatara, switches n’ibindi bikoresho bikorana. Ntigenewe kohereza videos nini nka Wi-Fi; ahubwo ikora neza mu kohereza amakuru mato ariko kenshi.

10. Z-Wave

Z-Wave na yo ni wireless technology ikoreshwa cyane muri smart homes.

Ibikoresho nka sensors, amatara, locks n’ibindi bishobora gukoresha Z-Wave kugira ngo bivugane. Ikintu cyayo cy’ingenzi ni uko yagenewe gukoresha ingufu nke no gutuma ibikoresho byinshi bikorana muri network imwe.

11. LoRa na LoRaWAN

LoRa ni uburyo bwagenewe kohereza amakuru kure cyane hakoreshejwe ingufu nke.

Aho kohereza video cyangwa file nini, LoRa ikoreshwa cyane mu kohereza amakuru mato ava kuri sensors, urugero nk’ubushyuhe, ubushuhe cyangwa amakuru y’ibikoresho biri kure. Ni ingenzi cyane muri IoT, aho devices nyinshi zishobora gukenera kohereza amakuru kure zidakoresha amashanyarazi menshi.

12. Mobile Network

4G na 5G na byo ni uburyo bwo kohereza data butagira cable hagati ya telefoni n’umuyoboro wa mobile network.

Iyo wohereje message, urebye video kuri internet cyangwa ukamanura file ukoresheje mobile data, telefoni yawe ivugana na cell tower ikoresheje radio waves. Cell tower na yo ikohereza amakuru kuri network, amaherezo akagera kuri server cyangwa indi service ukoresha.

Wasoma n'iyi: Amakosa ukwiye kwirinda kugira ngo mudasobwa yawe irambe

13. Satellite Communication

Iyo nta mobile network cyangwa Wi-Fi bihari, satellite communication ishobora gutuma amakuru anyura hagati y’igikoresho n’icyogajuru kiri mu kirere.

Telefoni cyangwa indi device yohereza signal hejuru kuri satellite, satellite ikayohereza ku kindi gice cya network. Ubu buryo bufite akamaro cyane ahantu hatagera cellular networks, nubwo uburyo bukoresha satellite butandukanye kandi bufite imbogamizi zawo.

None se kuki hari ubu buryo bwinshi?

Impamvu ni uko nta wireless technology imwe ibasha gukora byose neza.

Bluetooth ikora neza ku bikoresho biri hafi kandi ikoresha ingufu nke. Wi-Fi ishobora gutanga umuvuduko munini. NFC ikora neza iyo devices zegeranye cyane. UWB ikaba nziza mu kumenya intera n’aho device iri. LoRa ikaba nziza mu kohereza amakuru mato kure cyane, naho mobile networks na satellite bigafasha amakuru kugera ahantu hanini cyane.

Ni yo mpamvu iyo twohereje data tutakoresheje cable, atari ukuvuga ko data iba "iri mu kirere" nta buryo ikoresha. Data ihindurwa signals, igakorerwa kuri technology runaka, ikanyuzwa mu miraba ya radio cyangwa ubundi buryo, igasubizwa mu makuru device yakira ishobora kumva.

Mu by’ukuri, wireless technology zitandukanye ni nk’imihanda itandukanye yo koherezamo amakuru. Umwe ushobora kuba mugufi kandi wihuse, undi ukaba muremure ariko ugakoresha ingufu nke, naho undi ukaba wagenewe gusa gutwara amakuru make. Icy’ingenzi ni uko buri buryo bwubakiwe gukemura ikibazo cyihariye.